Megatruh
- Papat Juli tahun rongèwu rongpuluh/
Nuju ari Setu legi/
Wus pinegat mas mirahku/
Nyi Hèrwangi Dwi Kusrini/
Tinimbalan mring Hyang Manon// - Lir sinendhal sapandurat manah ulun/
Tan bisa ngucap ing lahir/
Gya manah tinata sampun/
Padhang sumarah mring Gusti/
Jer ingkang murba kuwaos// - Jurung donga nyenyuwun sarta manekung/
Paringana kula niki/
Sémah sanak anak putu/
Rahmat kang adi kodrati/
Mrih tentrem kiyat tan séwot// - Tinampia kang kapundhut mirahingsun/
Malbèng Swarga langgeng adi/
Dadia lantarnipun/
Berkah kang tinilar sami/
Ngimani saya pitados/ - Nenggih sampun dhawah titi wancinipun/
Wadhag manjing bumi Minggir/
Bali asalé mung lebu/
Rinengkuh Ibu Pertiwi/
Sarwi ngrantu jaman mengko// - Purna sampun kidung pepisahanipun/
Matur nuwun mring sesami/
Kadang rowang kang bebantu/
Kulawarga kang rudatin/
Gusti kang paring gegantos// - MAnah kula mung suméndhé karsanipun/
NYObi sampun miradati/
RUpa réka wus katempuh/
DAtan saged sélak Gusti/
TINimbalan mung cumadhong//
In memoriam Veronica Herwangi Dwi Kusrini Kusumo
RIP 3 September 1961 – 4 Juli 2020
Sor Blimbing, 06072020
Ki Sandinama
